Baadhi ya vijana waliojiunga na Chama hicho wakila kiapo.
Kazi ikiendelea ziarani.
ZIARA ya Mwenyekiti wa Vijana Wilaya ya Mwanga Mkoa wa Kilimanjaro, Japhar Mghamba akiongozana na Katibu Msaidizi wa Mkoa Maalum wa Vyuo Vikuu Daniel Zenda inaendelea kwa mafanikio makubwa katika wilaya hiyo ambapo mpaka sasa imefanikiwa kuingiza Vijana 1,800 katika Jumuiya ya Umoja wa Vijana wa Chama Cha Mapinduzi (UVCCM) pamoja na Chama.
Ziara hiyo iliyobeba jina la ‘Oparesheni Kokoro’ iliyoanza wiki iliyopita ilipata misukosuko hasa baada ya moja ya msafara wake kushambuliwa kwa risasi na watu wasiojulikana kwa sasa inaendelea.
Oparesheni Kokoro inayolenga kuhamasisha Vijana wa Upinzani na wasio na vyama kujiunga na Chama Cha Mapinduzi (CCM), kuhamasisha Vijana wa CCM kugombea nafasi mbalimbali katika uchaguzi ujao wa Serikali za mitaa hapo Oktoba mwaka huu pamoja na kukagua, kuhamasisha na kuelezea katika matawi na kata juu ya utekelezaji wa Ilani ya chama kwa kauli mbiu “CCM Mwanga Ukimya sasa Basi”.
Oparesheni Kokoro tayari imeshapita katika kata ya Kisangara, maeneo ya milima ya upareni maeneo ya Ugweno, Msangeni, Kifula, Mamba na Kikweni. Viongozi hao wa Vijana wa Chama Cha Mapinduzi wametembelea vikundi mbalimbali vya bodaboda, makundi ya wajasiriamali wadogo na wakubwa pamoja na kukagua miradi iliyoainishwa kwenye Ilani ya Chama ambayo inayoendelea kutekelezwa wilayani humo na Serikali ya Chama Cha Mapinduzi.
Viongozi hao wakiwa wanahutubia mkutano wa hadhara katika eneo la Msangeni waliwataka wananchi waendelee kuiamini CCM kwani ndio Chama Bora Cha siasa ambacho kinasikiliza kero za wananchi wake na kuzitafutia ufumbuzi na kutaja kero mbalimbali ambazo tayari zimepatiwa ufumbuzi wa kudumu wilayani humo. Ziara hiyo inaendelea katika kata na maeneo mengine ya wilaya ya Mwanga.