Juu pichani ni baadhi ya wanafunzi wa Chuo Cha Uhasibu Jijini (TIA) wakijibu baadhi ya maswali kama sehemu ya ukusanyaji maoni ili kuboresha sera ya TEHAMA. Zoezi hilo liliendeshwa na Wizara ya Ujenzi, Uchukuzi na Mawasiliano Makoani Mbeya.
 |
| Mkurugenzi Msaidizi anayeshughulikia masuala ya Simu katika Wizara ya Ujenzi ,Uchukuzi na Mawasiliano Ndugu John Mwera akizungumza na wanahabari katika viwanja vya Chuo Cha Uhasibu jijini Mbeya( TIA ) juu ya zoezi la uchukuaji maoni na ushauri kwa wadau katika kuboresha sera ya Taifa ya Habari ,Teknologia na Mawasiliano (TEHAMA). |
 |
| Mwanafunzi shule ya sekondari Forest jijini Mbeya Mariam Jordan akijiandikisha kwa ajili ya kutoa maoni yake katika zoezi la uboreshaji wa sera ya Taifa ya TEHAMA zoezi ambalo limeratibiwa na Wizara ya Ujenzi ,Uchukuzi na Mawasiliano ,katika viwanja vya Chuo Cha Uhasibu Jijini Mbeya( TIA) |
 |
| Baadhi ya wanafunzi wa Chuo Cha Uhasibu Jijini (TIA) na wadau mbalimbali kutoka Mkoani Mbeya wakijibu baadhi ya Maswali kama sehemu ya ukusanyaji maoni ili kuboresha sera ya TEHAMA . |
Na Emanuel Madafa, Mbeya
WIZARA ya Ujenzi, Uchukuzi na Mawasiliano imetoa wito kwa wananchi na wadau mbalimbali kuendelea kutoa maoni na mapendekezo ili yatumike kuboresha Sera mpya ya Taifa ya Habari Teknologia ya Mawasiliano (TEHAMA) ya (2016) ili kuisaidia serikali kutatua changamoto za upatikanaji wa habari na mawasiliano katika jamii.
Wito huo umetolewa jijini Mbeya na Mkurugenzi Msaidizi anayeshughulikia maswala ya simu katika Wizara ya Ujenzi, Uchukuzi na Mawasiliano, John Mwera wakati wa zoezi la uchukuaji maoni lililofanyika katika viwanja vya chuo cha Uhasibu (TIA) jijini Mbeya.
Alisema Teknolojia ya habari na mawasiliano hapa nchini imekuwa ikikua kwa kasi kubwa katika kipindi cha miaka kumi tangu serikali ilipotunga sera kwa mara ya kwanza mwaka 2003.
Alisema hali hiyo imechangia kuwepo kwa miundombinu ya huduma za mawasiliano kila mahala na kufanya matumizi kuwa makubwa ambapo zaidi ya watu milioni 39 wanatumia mawasiliano ya simu hivyo kufanya kuibuka kwa changamoto mbalimbali katika sekta hiyo.
Alisema ili kufahamu changamoto wanazo kutananazo wananchi pamoja na mtizamo wao katika utumiaji wa mawasiliano, wizara hiyo imeamua kuweka utaratibu wa kuweka vituo vya kukuza ubunifu katika jamii katika kila mkoa ambapo kila mwananchi anakuwa huru katika kutoa maoni yao na ushauri ili kuisaidia serikali katika
kupanga mikakati ya kuweza kuzitatua changomoto hizo.
“Huwezi kukaa ofisini ukatunga sera ambazo haziwahusu mwananchi wa kawaida hivyo lazima twende kwa wananchi na kujua wanahitaji nini ili kutunga sera na kuweza kuzitatua” Alisema Mwela.
Aidha amesema kuwa kila maoni yanayotolewa na wananchi serikali inayathamini katika kuweza kutoa muelekeo wa sekta ya mawasiliano kwani sekta hiyo bado inamchango mkubwa sana katika kutoa huduma mbalimbali kwa wananchi.
Hata hivyo alisema bado wizara inakabiliwa na changamoto mbalimbali ikiwa ni elimu ndogo kwa waanchi juu ya
utunzaji wa miundombinu ya sekta ya mawasiliano hususani mkongo wa taifa sanjali na wizi wa mafuta kwenye minara ya simu hivyo amewataka wananchi kuwa walinzi wa miundombinu hiyo ili kuendelea kukuza sekta hiyo sanjali na kulahisisha upatikanaji wa huduma kwa jamii.
Aliongeza kuwa zoezi hilo la uchukuaji maoni kwa wananchi juu ya uboreshaji wa sera ya TEHAMA
itaendelea inchi nzima katika mikoa yote ya Tanzania bara na Visiwani.