* Baada ya Katavi Hifadhi nyingine nazo zitatolewa kwa wawekezaji
* Katibu Mkuu ashinikizwa, abaki njia panda kuidhinisha safari, malipo
* Urafiki wa Waziri, Lembeli waibua shaka miongoni mwa watumishi
Waziri wa Maliasili na Utalii, Lazaro Nyalandu, yupo kwenye hatua za mwisho za kuikabidhi Hifadhi ya Taifa ya Katavi kwa mwekezaji wa Afrika Kusini.
Kwa kuanza, ameshakamilisha mipango ya kuingia makubaliano na kampuni ya Afrika Kusini ya African Park Network, ili ichukue Hifadhi hiyo ya Taifa.
Uamuzi wa kuikabidhi Katavi kwa mwekezaji, unafanywa kwa siri na kwa uharaka ambao umewaacha watendaji wengi ndani ya Wizara ya Maliasili na Utalii wakiwa wameshikwa na bumbuwazi.
Kwa sasa Hifadhi za Taifa ni 16. Nazo ni Arusha, Gombe, Katavi, Mlima Kilimanjaro, Kitulo, Mahale, Ziwa Manyara, Mikumi, Mkomazi, Ruaha, Kisiwa cha Rubondo, Saadani, Kisiwa cha Saanane, Serengeti, Tarangire na Milima ya Udzungwa.
Hifadhi ya Katavi ni ya tatu kwa ukubwa nchini Tanzania baada ya Seregenti na Ruaha. Ukubwa wake ni kilometa za mraba 4,471. Inapatikana kusini magharibi mwa Ziwa Tanganyika.
Habari za uhakika ambazo JAMHURI imezipata, zinasema Hifadhi ya Taifa ya Katavi inakabidhiwa kwa kampuni hiyo ya Afrika Kusini ikiwa ni utekelezaji maagizo ya Waziri Nyalandu.
Hili ni moja ya mapigo makubwa aliyoyaandaa, ikiwa ni mbali na uswahiba wake na kampuni za TGT zinazomilikiwa na bilionea wa Marekani. Tayari ameshaanza mipango ya kuhakikisha bilionea huyo anapewa vitalu ambavyo kwa sasa vinamilikiwa na Watanzania wazalendo.
Awali, mpango wa “kuuza” hifadhi hiyo uliwasilishwa kwa mawaziri waliopita, lakini ulikwama kutokana na hofu halali za wataalamu wa uhifadhi katika Wizara ya Maliasili na Utalii na wadau wengine.
Ubarikio wa kuikabidhi Katavi kwa raia wa Afrika Kusini, ambao kwa miaka mingi Serikali ya Tanzania iliwapinga, umepangwa kuanza Machi 27 hadi 29, mwaka huu, katika mkutano utakaofanyika Johannesburg, Afrika Kusini.
Kwa mujibu wa nyaraka ambazo JAMHURI imezipata, kufanyika kwa mkutano huo kunatokana na shinikizo la Waziri Nyalandu, anayetajwa kama muumini mkuu na rafiki wa karibu wa raia wa kigeni, hasa Wazungu.
Nyaraka ambazo JAMHURI imezipata zinaonesha kuwa Nyalandu amemwamuru Katibu Mkuu wa Wizara ya Maliasili na Utalii, Maimuna Tarishi, awape taarifa watu wanaopaswa kuhudhuria mkutano huo nchini Afrika Kusini bila kukosa.
Pamoja naye Nyalandu, wengine walioko kwenye msafara huo kwa maelekezo ya Waziri ni mwakilishi kutoka Mamlaka ya Hifadhi za Taifa (TANAPA). Kwa sababu hiyo, Mkurugenzi wa TANAPA, Allan Kijazi, bila shaka atatakiwa asikosekane kwenye mkutano huo.
Mwingine ni Mkurugenzi wa Idara ya Wanyamapori. Hata hivyo, kuna uwezekano wa Idara hiyo kuwakilishwa na Kaimu Mkurugenzi wake, Paul Sarakikya.
Katika hatua inayotia shaka dhamira ya mpango huu, mwingine kwenye msafara huo amepangwa kuwa ni Mwenyekiti wa Kamati ya Kudumu ya Bunge ya Ardhi, Maliasili na Mazingira, James Lembeli. Pamoja naye, ametakiwa Katibu Mkuu wa Wizara ya Maliasili na Utalii, Tarishi awepo; lakini kuna habari kwamba huenda akawakilishwa na Naibu Katibu Mkuu, Nuru Millao.
Uchunguzi wa awali uliofanywa na JAMHURI umebaini kuwa suala hili la kutolewa kwa Hifadhi za Taifa kwa wawekezaji umeweza kuwaunganisha Nyalandu na Lembeli, jambo ambalo linazidi kuzua shaka.
Kampuni ya African Park Network imekuwa na mpango wa kuhodhi Hifadhi za Taifa katika mataifa kadhaa barani Afrika, lakini inatajwa kuwa imekosa mafanikio. Mfano wa karibuni ni umiliki wake wa Hifadhi ya Taifa ya Akagera nchini Rwanda ambako kama ilivyokuwa Net Group Solutions nchini Tanzania, imeshindwa kabisa kuonesha mafanikio.
Vyanzo vya habari vimeiambia JAMHURI kwamba Waziri Mkuu, Mizengo Pinda, ameweza kukubaliana na ujio wa African Park Network, ingawa barua kutoka Ofisi ya Katibu Mkuu Kiongozi imepinga vikali mpango huo.
Pinda ameonekana kuwa njia ya mkato kwenye suala hili kutokana na uelewa wake wa kiasi katika masuala la uhifadhi. Kwa mwanya huo, imeelezwa kuwa Waziri Nyalandu ameweza kupenyesha hoja yake ya kuletwa kwa makaburu hao na kufanikiwa.
Bado wahifadhi wengi wanapinga mpango wa kutolewa kwa Hifadhi za Taifa kwa maelezo kwamba haupaswi kuchukuliwa kama uamuzi wa Wizara, bali ni jambo linalostahili mjadala wa kitaifa.
Chanzo cha habari kimesema kama kampuni hiyo ya makaburu itafanikiwa kuitwaa Katavi, basi huo utakuwa mwendelezo wa kutwaa Hifadhi nyingine, ikiwamo Serengeti.
Kadhalika, imebainika kuwa mashirika kadhaa yaliyo chini ya Wizara ya Maliasili na Utalii yanashinikizwa yatoe fedha za tiketi na za kujikimu kwa ujumbe utakaokwenda Johannesburg kubariki “kuuzwa” kwa Hifadhi za Taifa. Mashirika ya umma yanayolengwa ni Mamlaka ya Hifadhi ya Ngorongoro (NCAA) na Shirika la Hifadhi za Taifa Tanzania (TANAPA).
Wasifu wa Katavi
Katavi ina mto Katuma ambao ni muhimu kwa uwepo kwa maziwa Katavi na Chada. Sifa nyingine ya pekee ya hifadhi hii ni wingi wa wanyama aina ya viboko na mamba.
Kabla ya ujangili kushamiri, ilikadiriwa kwamba Katavi ilikuwa na ndovu 4,000, maelfu ya nyati, twiga, pundamilia, impala na aina nyingine mbalimbali za wanyamapori.
Utata wa Nyalandu
Nyalandu, licha ya kuwa ni Waziri wa Maliasili na Utalii, ana uhusiano wa karibu mno na wa muda mrefu na kampuni ya Mwiba Holdings Ltd. Hii ni kampuni dada ya kampuni nyingine za Friedkin Conservation Fund (FCF) ambazo ni Wengert Windrose Safaris (WWS) na Tanzania Game Trackers and Safaris (TGTS). Hata hivyo, tofauti na WWS na TGTS, Mwiba Holdings Ltd haijasajiliwa kama kampuni ya uwindaji wa kitalii.
Kuanzia Julai 24, 2013 kampuni hiyo imekuwa ikiomba kupatiwa haki ya matumizi ya eneo wanalomiliki katika Kijiji cha Makao, Wilaya ya Meatu, kwa ajili ya utalii wa picha na uwindaji wa kitalii. Maombi haya yalifikishwa wizarani na kukataliwa na aliyekuwa Waziri wa Maliasili na Utalii, Balozi Khamis Kagasheki.
Uchunguzi unaonesha kuwa Nyalandu ameshinikiza kampuni ya Mwiba na nyingine zenye nasaba nayo, zipewe maeneo kwa ajili ya kuanzisha ranchi, jambo ambalo ni kinyume kabisa cha sheria na kanuni.
source:jamiiforum