Kaimu Kamanda wa Polisi Mkoa wa Mbeya Butusyo Mwambelo akionyesha silaha aina ya SMG yenye namba 1996 AFU 1120 na risasi 26 kwenye magazine ambayo ilikuwa ikitumika na majambazi hao katika tukio la kutaka kufanya uhalifu kwenye duka la vinywaji mali ya Hamisi mji mdogo wa Matundasi Wilayani Chunya Mkoani Mbeya April 27 mwaka huu.
Na EmanuelMadafa.
JESHI la Polisi mkoani Mbeya limewauwa watu watatu wanaodhaniwa kuwa ni majambazi wakati wa kurushiana risasi.
Kaimu kamanda wa Polisi Mkoa wa Mbeya Butusyo Mwambelo amesema tukio hilo limetokea April 27 mwaka huu saa 2 usiku , huko katika kijiji cha Matundasi Wilayani Chunya Mkoani Mbeya .
Amesema watu watano wanaosadikiwa kuwa ni majambazi wakiwa na bunduki moja aina ya SMG yenye namba 1996 AFU 1120 na risasi 26 kwenye magazine , walifika kijijini hapo kwa lengo la kufanya uhalifu kwenye duka la jumla la kuuzia vinywaji mali ya Ndugu Hamis Mkazi wa eneo hilo la Matundasi Chunya.
Kaimu Kamanda Mwambelo , amesema watu hao ambao miili yao imehifadhi kwenye chumba cha mochwari katika hospitali ya wilaya ya Chunya , majina na makazi yao bado hayajajulikana.
Akifafanua, amesema taarifa za siri kutoka kwa raia wema zilifikia jeshi la polisi na ndipo askari polisi walipofika kwenye eneo la tukio.
“Baada ya Polisi kufika katika eneo la tukio watu hao walistuka kuwa wanafuatiliwa na askari Polisi na hivyo kuanza kukimbia kuelekea kijiji cha Matondo kwa kutumia pikipiki yenye namba za usajili MC 761. AFS aina ya Sanlag yenye rangi nyeusi”,amesema Mwambelo .
Silaha mbalimbali zilizo kamatwa katika tukio la kuuwawa kwa majambazi wilayani Chnua mkoani mbeya April27 mwaka huu.
ameongeza kuwa walipoona Polisi wanawakaribia walianza kurusha risasi hovyo hewani ambapo jambazi mmoja alijeruhiwa baada ya kupigwa risasi mguuni na tumboni na kufariki dunia ambapo majambazi wanne walifanikiwa kutoroka .
Kutokana na hali hiyo Jeshi la Polisi lilianzisha msako usiku huo na kufanikiwa kuwaua majambazi wengine wawili ambao huku wengine wakitoroka msako mkali unaendelea ili kuwakamata wahalifu hao.
Amesema katika eneo la tukio, ilipatikana bunduki moja aina ya SMG yenye namba 1996 AFU 1120 ikiwa na risasi 27 kwenye magazine. Pia pikipiki iliyokuwa inatumiwa na majambazi hayo, iliwezea kupatikana pamoja na panga .
Mwambelo alitoa wito kwamba wananchi waendelee na moyo huo huo wa kuwafichua watu wanaowatilia shaka ili waweze kudhibitiwa mapema kabla ya kufanya uhalifu sanjali na kufika katika hospital ya wilaya ya Chunya kwa lengo la kufanya utambuzi wa miili ya majambazi hao kwani majina yao bado hayajatambulika.