Baadhi ya miili ya waasi waliouawa katika mapambano hayo
Jumla ya wapiganaji 26 wa waasi nchini Libya wameuawa katika mapambano na vikosi vitiifu kwa Kanali Muhammar Gaddafi yaliyotokea mashariki mwa mji wa Brega.
Kwa mujibu wa gazeti la kila siku la Quryna linalotolewa kwenye mji wa Benghazi, wengi wa wapiganaji hao wa waasi waliuawa na wadunguaji.Zaidi wa wapiganaji 40 walijeruhiwa.
Waasi hao wamekuwa wakijaribu kudhibiti baadhi ya miji muhimu katika harakati zao za kuelekea mji mkuu Tripoli, kumuondoa madarakani Kanali Gaddafi.
Wakati huo huo maafisa wa Wizara ya Ulinzi ya Marekani wamesema kuwa jeshi la Libya hapo siku ya Jumapili,kwa mara ya kwanza tokea kuanza kwa mzozo huo lilifyatua kombora la SCUD
Wamesema kombora hilo lilifyatuliwa kutoka katika eneo linalodhibitiwa na serikali la Sirte kuelekea mji wa Brega lakini likaangukia jangwani na halikusababisha madhara yoyote.
-DW