Waandishi habari wawili waliouwawa nchini Mali
IMERIPOTIWA kuwa watu wenye silaha wamewateka nyara na kuwauwa waandishi wa habari wawili wa redio moja ya nchini Ufaransa ambao walikuwa wakielekea Kaskazini mwa Mali kwa shughuli za kikazi Novemba 02, 2013.
Maofisa wa nchi za Ufaransa na Mali walisema watu hao wenye silaha waliwakamata waandishi hao wakati walipokuwa wakitoka katika nyumba ya kiongozi wa waasi. Vifo hivyo vinakuja siku nne baada ya Ufaransa kusherehekea kuachiliwa huru kwa raia wake wanne ambao wamekuwa wakishikiliwa kwa muda wa miaka mitatu na makundi ya washirika wa al-Qaeda katika eneo la Afrika kaskazini.
Hata hivyo haikufahamika mara moja ni kundi gani limewauwa waandishi hao wa radio ya kimataifa ya Ufaransa, Radio France International. Ufaransa ilifanya operesheni ya kijeshi ya kuingilia kati Januari mwaka huu katika koloni lake hilo la zamani kujaribu kuwaondoa wapiganaji wa Kiislamu kutoka madarakani katika Mji wa Kidal pamoja na miji mingine eneo la Kaskazini mwa Mali. Taarifa zinasema Claude Verlon na Ghislaine Dupontni ni wandishi wa radio RFI waliouwawa.
Makundi yanayotaka kujitenga sasa yamerejea katika eneo hilo. Rais wa Ufaransa Francois Hollande ameeleza masikitiko yake kutokana na tukio hilo la kuchukiza. “Verlon na Dupont walikamatwa na watu kadha wenye silaha baada ya kumaliza mahojiano,” alisema ofisa mmoja. Miili yao ilitupwa baadaye kilometa kadhaa nje ya mji katika barabara inayoelekea Tinessako, katika eneo la mashariki ya mji wa Kidal, kwa mujibu wa mtu ambaye aliona miili hiyo na maofisa wanne ambao walielezwa kuhusu suala hilo.
Shirika la utangazaji la RFI limemueleza Dupont mwenye umri wa miaka 51, na Verlon mwenye umri wa miaka 58, kuwa wafanyakazi wenye ujuzi wa hali ya juu wakiwa na uzoefu wa miaka mingi katika maeneo yenye changamoto. Dupont alikuwa mwandishi habari ambaye “alikuwa anaipenda kazi yake pamoja na bara la Afrika ambapo alikuwa akiandika habari zake tangu alipojiunga na RFI mwaka 1986,” shirika hilo limesema katika taarifa. Verlon alikuwa “ameyazowea mazingira magumu duniani kote.”
Wafanyakazi wa shirika hilo, “wameshtushwa mno, wamechukizwa na kukasirika,” taarifa hiyo imesema. Ufaransa ilianzisha uchunguzi wa kisheria kuhusiana na utekaji nyara na vifo “vinavyohusishwa na makundi ya kigaidi,” imesema ofisi ya mwendesha mashtaka mkuu wa serikali. Tuhuma katika mauaji hayo ya Jumamosi haraka zimewaangukia wapiganaji wa Kiislamu.
“Kwa taarifa ambazo ninazo, shingo zao zimekatwa. Hatufahamu kwa hakika nani waliowakamata, lakini ripoti tunazozisikia zinaonesha kuwa walikuwa ni makundi ya Waislamu wenye itikadi kali,” amesema Lassana Camara , naibu mkuu wa wilaya ya Tinessako.
Maofisa kadha wa Kidal waliohojiwa kwa simu wamesema kuwa waandishi hao wa RFI walikamatwa baada ya mahojiano nyumbani kwa Ambeiry Ag Rhissa, Kaimu Mkuu wa Kundi la Harakati za Ukombozi wa Azawad, ama NMLA, kundi la Watuareg linalotaka kujitenga ambapo waasi wake walilivamia eneo la Kaskazini mwa Mali mwaka jana.
Waasi hao baadaye walifukuzwa kutoka katika eneo hilo la wapiganaji wenye mafungamano na al-Qaeda lakini sasa wamerejea na kulidhibiti eneo la Kidal katika miezi ya hivi karibuni.
-DW