Timu ya taifa ya wanawake ya Tanzania maarufu Twiga Stars imelazwa na Zimbabwe kwenye mechi ya kufuzu kwa fainali za Kombe la Mataifa ya Afrika kwa wanawake 2016.
Twiga Stars wamechapwa 2-1 na Zimbabwe katika mechi iliyochezewa uwanja wa Azam complex jijini Dar es Salaam.
Magoli ya Zimbabwe yamefungwa na mchezaji Elina Jeke mabao yote mawili nalo bao la Twiga Stars likatiwa kimiani na Mwanahamisi Omar.
Baada ya mchezo huo kumalizika, kocha wa Twiga Stars Nasra Juma amesema kukosa ligi ya wanawake Tanzania ni moja ya sababu inayopelekea timu hiyo kushindwa kufanya vizuri kwenye mashindano.
Mechi ya marudiano itachezwa hivi karibuni mjini Harare nchini Zimbabwe.