SHIRIKISHO la Soka Tanzania (TFF) jana limetangaza viingilio vya mchezo wa Ligi Kuu ya Vodacom Tanzania Bara kati ya watani wa jadi Simba SC na Yanga SC utakaochezwa Jumamosi Uwanja wa Taifa, Dar es salaam, huku kiingilio cha chini kikiwa ni Shilingi elfu saba tu (7,000).
Kiingilio cha juu cha mchezo huo kitakua shilingi Elfu Thelathini (30,000) kwa VIP A, Elfu Ishirini (20,000) VIP B & C, Elfu Kumi (10,000) kwa viti vya rangi ya machungwa (Orange), na Elfu Saba (7,000) kwa viti vya rangi ya bluu na kijani.
Tiketi za mchezo huo zitaanza kuuzwa siku ya Ijumaa saa 2 kamili asubuhi katika vituo vya TFF (Karume), Buguruni Olicom, Ubungo Oilcom, Kidongo Chekundu (Mnazi Mmoja), Posta (Agip), Dar Live (Mbagala), Uwanja wa Taifa, Makumbusho Stand, Kivukoni Ferry.
Mchezo huo utachezeshwa na waamuzi wote wenye beji za FIFA, mwamuzi wa katikati Jonesia Rukyaa (Kagera), akisaidiwa na Josephat Bulali (Tanga), Samwel Mpenzu (Arusha), mwamuzi wa akiba Elly Sasii (Dar) huku Kamisaa wa mchezo huo akiwa Khalid Bitebo (Mwanza).
Ligi hiyo ya Vodacom itaendelea Jumamosi kwa michezo sita, Young Africans v Simba (Taifa), Mbeya City v Azam (Sokoine), Stand United v JKT Ruvu (Kambarage), Toto Africans v Kagera Sugar (CCM Kirumba), Mgambo Shooting v Tanzania Prisons (Mkwakwani) na Majimaji FC v Mtibwa Sugar (Majimaji).
Jumapili ligi hiyo itaendelea kwa michezo miwili, Mwadui FC v Coastal Union uwanja wa Mwadui Complex, huku Ndanda FC wakicheza dhidi ya African Sports uwanja wa Nagwanda Sijaona mjini Mtwara.
REFA wa kike, Jonesia Rukyaa wa Kagera ndiye anatarajiwa kupuliza kipyenga katika mchezo wa watani wa watani wa jadi, Simba na Yanga SC Jumamosi Uwanja wa Taifa, Dar es Salaam.
Rukyaa aliyechezesha pambano la mwisho la Nani Mtani Jembe Simba SC ikiifunga Yanga SC 2-0 mwaka juzi mabao ya Awadh Juma na Elias Maguri kwa mara ya pili katika historia yake atachezesha mechi ya watani Jumamosi
Katika mchezo huo wa Ligi Kuu ya Vodacom Tanzania Bara, Rukyaa refa asiye na mzaha kabisa uwanjani, atasaidiwa na Josephat Burali wa Tanga na Samuel Mpenzu wa Arsusha.
Refa wa akiba atakuwa Elly Sasii wa Dar es Salaam, wakati Kamisaa atakuwa mshambuliaji wa zamani wa Pamba ya Mwanza, Khalid Bitebo ‘Zembwela’.