Ubao wa matangazo wa uwanja wa taifa leo ulisomeka hivi hadi mwisho wa mechi.
Na Mwandishi Wetu
MECHI ya Mashindano ya Tusker Chalenji kati ya Timu ya Tanzania, Kilimanjaro Stars na timu ya Rwanda imemalizika muda mfupi huku vijana wa Rwanda wakiibuka vinara wa mchezo huo.
Rwanda imefanikiwa kushinda mchezo huo kwa kuilaza Kilimanjaro Stars 1-0, goli lililofungwa katika dakika 22 kipindi cha kwanza cha mchezo na nahodha wa Rwanda, Kalekezi Olivier. Kilimanjaro ambao katika mchezo huo walionekana kuzidiwa kwa kushindwa kumpa shida langoni golikipa wa Rwanda, walijitahidi kurudisha goli hilo bila mafanikio yoyote.
Akizungumza mara baada ya mchezo huo, Kocha Mkuu wa Kilimanjaro Stars, Bonifasi Mkwasa amekiri kuzidiwa katika mchezo huo kutokana na wachezaji wake kukosa nafasi baada ya kubanwa zaidi na wapinzani wao.
Aidha amesema kupoteza mchezo huo hakuwakatishi tamaa hivyo kwa sasa wanajipanga kuweza kufanya vizuri zaidi katika michezo inayofuata. Naye Kocha Mkuu wa Timu ya Rwanda Sredojovic Milutin amesema wanachukulia mechi zote muhimu kwani wanajiandaa na mashindano ya kuelekea kombe la dunia.