Baadhi ya wachezaji wa Taifa Stars wakiongozwa na Mbwana Samata wakishangilia goli. Picha na Mjengwa Blog
MCHEZO wa kirafiki wa kimataifa kati ya timu ya Taifa ya Tanzania, Taifa Stars na ile ya Cameroon jana ulimalizika huku wachezaji wa Cameroon wakishindwa kuamini macho yao baada ya kubanduliwa kwa bao 1-0.
Taifa Stars ambao walionekana kucheza kwa kujiamini walijipatia bao lao la ushindi dakika moja kabla ya kumalizika kwa mpambano huo mkali uliovuta hisia za mashabiki wengi.
Goli hilo la pekee lilipachikwa kimiani na mchezaji Mbwana Samata baada ya kupokea pasi kutoka kwa mchezaji Domayo dakika ya 89 ya mchezo huo. Samata kwa sasa anacheza mpira wa kulipwa katika klabu ya TP Mazembe ya DRC Congo.