Boniface Wambura, Ofisa Habari wa TFF
Na Mwandishi Wetu
TIMU ya Taifa (Taifa Stars) inaingia kambini Novemba 3, kujiandaa kwa mechi ya mchujo ya Kombe la Dunia dhidi ya Chad itakayochezwa Novemba 11 jijini N’Djamena.
Kwa mujibu wa taarifa iliyolewa leo kwa vyombo vya habari toka TFF ni kwamba wachezaji wote wanatakiwa kuripoti kambini kesho, isipokuwa wale wanaocheza mpira wa kulipwa nje ya nchi ambao wataanza kuingia nchini Novemba 4 mwaka huu.
Taarifa hiyo iliyotolewa na Ofisa Habari wa TFF, Boniface Wambura, inaeleza kuwa kambi ya Taifa Stars itakuwa hoteli ya New Africa na mazoezi yatafanyika Uwanja wa Kumbukumbu ya Karume, Dar es Salaam kulingana na programu za Kocha Mkuu wa timu hiyo Jan Poulsen. Timu inatarajiwa kuondoka nchini Novemba 8 usiku kwenda N’Djamena.
Wambura aliwataja waamuzi wa mechi ambao wote wanatoka Nigeria ni Bunmi Ogunkolade, Tunde Abidoye, Baba Abel na Abubakar Ago. Mtathimini wa waamuzi atakuwa Idrissa Sarr kutoka Mauritania wakati Kamishna wa mchezo huo ni Hamid Haddadj (Algeria).