RAIS wa Jamhuri ya Muungano wa Tanzania, Jakaya Kikwete kesho, (Agosti Mosi, 2011) anatarajia kuwa mgeni rasmi katika ufunguzi wa Wiki ya Sherehe za Nane Nane na Maonesho ya Kilimo mwaka huu kwenye Uwanja wa Maonesho ya Kilimo wa Nzuguni, Dodoma.
Shughuli kuu za Rais katika ufunguzi huo itakuwa ni kufungua Maonesho ya Kilimo ya Nane Nane kwa hotuba rasmi na baadaye kutembelea baadhi ya mabanda ya maonyesho hayo.
Hotuba hiyo ya kesho itakuwa badala ya Hotuba ya Mwisho wa Mwezi wa Julai ambayo ilikuwa itolewe jioni ya leo, Jumapili, Julai 31, 2011 lakini haitatolewa kwa sababu ujumbe na maudhi yake yatakuwemo katika hotuba ya kesho.
Rais tayari yuko mjini Dodoma tokea jana, Jumamosi, Julai 30, 2011 kwa vikao vya Chama Cha Mapinduzi (CCM) ambacho yeye ni Mwenyekiti wa taifa. Mara baada ya kuwasili jana, Rais Kikwete aliendesha Kikao cha Kamati ya Maadili na leo amekuwa anaendesha Kikao cha Kamati Kuu ya Halmashauri Kuu ya Taifa (NEC) ya chama hicho.