Naibu Jaji Mkuu wa Kenya aliyesimamishwa kazi, Nancy Baraza.
*Yaundwa tume chini ya Jaji Mtanzania kumchunguza
RAIS wa Kenya, Mwai Kibaki amemsimamisha kazi Naibu Jaji Mkuu, Nancy Baraza na kuunda jopo la majaji ambalo litachunguza mwenendo wa kazi wa kiongozi huyo kutokana na tuhuma zinazomkabili.
Taarifa zimesema Jaji Baraza, anatuhumiwa kumtishia maisha kwa bastola mlinzi wa duka moja kubwa, Bi Rebecca Kerubo wakati wa mkesha wa mwaka mpya. Jopo hilo litaongozwa na aliyekuwa Jaji Mkuu wa Tanzania, Augustino Ramadhan kama Mwenyekiti.
Wajumbe wengine ni Prof. Judith Behemuka, Philip Ransley, Surinder Kapila, Beuttah Siganga, Grace Madoka na Prof. Mugambi Kanyua.
Katika taarifa kwa vyombo vya habari kutoka Ikulu ya Nairobi, Rais Kibaki amesema wakati wa uchunguzi, Bi. Baraza hatoendelea na majukumu yake ya idara ya mahakama.
“Kwa wakati huu, Jaji Nancy Makokha Baraza, Naibu Jaji Mkuu, Mahakama ya juu ya Kenya amesimamishwa kazi mara moja kwa mujibu wa kifungu 168(5) cha katiba.” Alisema rais Kibaki.
Katika muda huo atakaokuwa amesimamishwa kazi, Jaji Baraza, atakuwa anapata nusu mshahara hadi pale uchunguzi utakapokamilika na kufahamika kupitia mapendekezo ya jopo kama atarejeshwa kazini au atimuliwe.
Kuundwa kwa jopo kumetokana na mapendekezo yaliyowasilishwa kwa rais Kibaki na tume inayoshughulika na masuala ya idara ya mahakama iliopendekeza Baraza asimamishwe kazi na uchunguzi juu ya mwenendo wake ufanywe.
-BBC