Waziri wa Ushirikiano wa Afrika Mashariki (EAC) Samwel Sitta akiwasili katika msiba wa Muigizaji wa siku nyingi Mzee Kipara aliyefariki usiku wa kuamkia jana huko Kigogo jijini Dar es salaam, Mzee Samwel Sitta ameungana na waigizaji, ndugu jamaa, na marafiki wa marehemu Mzee Kipara ambaye mwili wake utazikwa jana katika makaburi ya Kigogo, wanaompokea kulia ni Saimon Mwakifwamba Rais wa Shirikisho la wasanii wa Filamu nchini na kushoto ni Mwigizaji Hashim Kambi.
Na Mwandishi Wetu
WAKATI wasanii mbalimbali, ndugu, jamaa na marafiki wa msanii nguli wa maigizo Mzee Fundi Saidi, maarufu kwa jina la kisanii la Mzee Kipara wakijitokeza jana kumzika msanii huyo, Rais wa Tanzania, Jakaya Kikwete amekitumia salamu za rambirambi Kikundi cha Sanaa cha Kaole kuomboleza kifo cha msanii huyo maarufu na mkongwe.
Katika salamu zake za Januari 12, 2012, Rais Kikwete amesema kuwa amesikitishwa na kuhuzunishwa na habari za kifo cha Mzee Fundi Saidi ambaye amemweleza kuwa alichangia sana maendeleo ya Tanzania kupitia shughuli zake wa usanii wa uingizaji.
Mzee Fundi Saidi, maarufu kwa jina la Bwana Kipara alifariki dunia asubuhi ya Januari 11, 2012 nyumbani kwake Kigogo, Dar es Salaam akiwa na umri wa miaka 89. Katika salamu zake, Rais Kikwete amesema: “Nimepokea kwa huzuni na masikitiko makubwa habari za kifo cha Mzee Fundi Saidi. Sote tutamkumbuka kwa mchango wake mkubwa ambao alioutoa katika maendeleo ya nchi yetu kupitia shughuli zake za usanii wa miaka mingi wa uingizaji.”
Msanii wa maigizo Senga kushoto na mwenzake Pembe walikuwepo Kumsindikiza mwigizaji mwenzao na mzee wao katika shughuli za uigizaji.
Ameongeza Rais Kikwete katika salamu zake, “Nawatumieni nyie wasanii wa Kikundi cha Kaole salamu zangu za rambirambi za dhati ya moyo wangu. Napenda kuwaambia kuwa kifo cha Mzee Fundi Saidi kimelinyang’anya taifa letu na nyie wenyewe kisima cha uzoefu wa miaka mingi katika shughuli za sanaa. Kwa hakika, Mzee wetu huyo amechangia sana maendeleo ya taifa letu kupitia shughuli za usanii wa uingizaji na ameacha mfano bora wa kuigwa katika kutumikia nchi yetu kwa kutumia vipaji vyetu.”
Ameongeza Rais Kikwete: “Napenda pia kupitia kwenu kutuma salamu zangu za rambirambi kwa wana-familia, ndugu na jamaa wa Mzee Fundi Saidi. Wajulishe kuwa niko nao katika wakati huu wa majonzi na namwaomba Mwenyezi Mungu awape moyo wa subira kwa sababu yote ni mapenzi yake. Naungana nanyi katika kumwomba Mwenyezi Mungu, Mwingi wa Rehema, aiweke pema peponi roho ya Marehemu Fundi Saidi. Amen.