Mwenyekiti wa Kamati ya Maandalizi ya Mkesha Mkubwa yaani 'Dua maalum kwa Taifa', Askofu Godfrey Emmmanuel Malasi (katikati) akizungumza na waandishi wa habari leo jijini Dar es Salaam kuhusu mkesha mkubwa wa kuliombea taifa utakaofanyika Uwanja wa Taifa Desemba 31, 2011 ambapo mgeni rasmi atakuwa Rais wa Jamhuri ya Muungano wa Tanzania, Jakaya Kikwete. Wengine ni Viongozi wa kamati hiyo kutoka Umoja wa Makanisa ya Kikiristo Tanzania (Tanzania Christian Fellowship of Churches). (Picha na Aron Msigwa –MAELEZO)
*Serikali yapongezwa kupinga ushoga
Na Aron Msigwa –MAELEZO
UMOJA wa Makanisa ya Kikiristo Tanzania (Tanzania Christian Fellowship of Churches) umeandaa mkesha wa kuliombea Taifa la Tanzania na pia sala maalumu ya kumshukuru Mungu na kulivusha taifa katika miaka 50 ya Uhuru. Mgeni rasmi katika maombi hayo anatarajia kuwa Rais wa Jamhuri ya Muungano wa Tanzania, Jakaya Kikwete.
Akizungumza na waandishi wa habari leo jijini Dar es salaam, Mwenyekiti wa Kamati ya Maandalizi ya Mkesha Mkubwa kutoka Tanzania Christian Fellowship of Churches, Askofu Godfrey Emmmanuel Malasi amesema Watanzania wanapaswa kujua Mungu kusudi la Mungu kwa taifa la Tanzania.
Amesema katika kipindi hiki ambacho Taifa limetimiza miaka 50 ya uhuru, haina budi kila Mtanzania kufanya kazi kwa bidii na kushiriki katika uchumi wa taifa.
Viongozi wa Kamati ya Mkesha Mkubwa wa kuliombea taifa (waliosimama mbele) wakifanya maombi maalum kwa waandishi wa habari ili waweze kutekeleza majukumu yao ya kuitumikia jamii kwa uadilifu kutokana na changamoto mbalimbali wanazokumbana nazo. Maombi hayo yamefanyika leo jijini Dar es Salaam. Picha na Aron Msigwa–MAELEZO.
Amesema serikali inazo sera nzuri za kuwamilikisha wananchi rasilimali zao nchini na kila mmoja kuwa na maisha bora, lakini pamoja na hayo kila mwananchi wanapaswa kujituma kwa hali na mali kwa kuzitumia fursa zilizopo kujiletea maendeleo.
“Kila mmoja anapaswa kushiriki na kushirikishwa kikamilifu katika uchumi wa taifa letu ambalo sasa limemaliza miaka 50 ya uhuru, kila mtu anapaswa kutambua nafasi yake, tusikae kwa kubweteka, tusikae kwa kulalamika kila mtu ajue ni wakati wa kumiki na kurithishwa rasilimali zilizopo katika taifa hili”
Amesema mwaka huu dua maalum kwa taifa litafanyika katika mikoa 14 ya Tanzania ikiwemo Dar es Salaam, Arusha, Mwanza, Kilimanjaro, Singida Iringa, Mbeya, Iringa, Kagera, Dodoma, Ruvuma, Tabora, Tanga na visiwa vya Zanzbar na Pemba.
Amefafanua kuwa katika mkesha huo viongozi mbalimbali wa taifa, vyama vya siasa na balozi mbalimbali zipatazo 37 zilizopo nchini zimearikwa kushiriki mkesha huo na kuongeza kuwa tayari baadhi ya balozi zimethibitisha kushiriki mkesha huo.
Kuhusu maadalizi ya mkesha huo askofu Godfrey Malasi amesema yanaendelea vizuri na kutoa wito kwa wananchi kujitokeza kwa wingi katika dua hiyo maalum na kuongeza kuwa mkesha huo utaambatana na tukio maalum la watoto 50 kusimama uwanjani na kutamka maneno ya kupokea miaka 50 ijayo ikiwa ni ishara ya kupokea kizazi huru cha watanzania.
Kwa upande wake Makamu Mwenyekiti wa Kamati hiyo, Askofu Keneth Damas ameipongeza serikali kwa kuwa na msimamo wa kupinga suala la ndoa za jinsia moja (ushoga) katika mikutano ya kimataifa iliyofanyika hivi karibuni na kuuita uamuzi huo kuwa ni ushindi mkubwa kwa taifa la Tanzania na watu wake katika kuheshimu utu na utamaduni wa taifa na uukataaji wa vitendo vya udhalilishaji na kuongeza kuwa wao kama viongozi wa dini wataendelea kuonya na kufundisha watu wajue athari za dhambi hiyo.
“Sisi kama viongozi wa makanisa katika nchi hii tunapinga kwa nguzu zote vitendo vya ushoga ndani ya taifa letu, vitendo vya ushoga ndivyo vilivyosababisha Sodoma na Gomora kuchomwa moto kwa kuwa vilimchukiza sana Mungu, Sisi kama viongozi wa dini katika kizazi chetu na vizazi vijavyo hatutaki kufikia hapo na kuona taifa letu likichomwa moto”