MGAMBO Shooting imelazimishwa sare ya kufungana bao 1-1 na Ndanda FC ya Mtwara katika mchezo wa Ligi Kuu ya Vodacom Tanzania Bara jioni ya jana Uwanja wa Mkwakwani, Tanga.
Matokeo hayo, yanaifanya Mgambo JKT ifikishe pointi 17 baada ya kucheza mechi 16 na kuendelea kukaa nafasi ya tisa, wakati Ndanda FC inafikisha pointi 13 baada ya kucheza mechi 16, pia wakiendelea kukaa nafasi ya 14 katika Ligi ya timu 16 ambayo mwisho wa msimu mbili zitashuka.
Chande Magoja alianza kuifungia Mgambo JKT dakika ya 51, kabla ya Omar Mponda kuisawazishia Ndanda FC dakika ya 77.
Mechi nyingine za Ligi Kuu juzi, Coastal Union waliifunga 2-0 Yanga SC Mkwakwani, Simba SC iliitandika 4-0 African Sports Uwanja wa Taifa, Dar es Salaam, JKT Ruvu ilitoka sare ya 0-0 na Majimaji Uwanja wa Karume, Mtibwa Sugar ikashinda 1-0 dhidi ya Stand United na Mwadui FC ikashinda 1-0 dhidi ya Toto Africans.