Kocha wa Timu ya Liverpool Jurgen Klopp amelalamikia mfululizo wa mechi wakati wa sikukuu ya Krismasi hadi kuingia Mwaka Mpya ya Ligi Kuu England akidai kunaiumiza England kufanya vizuri katika mashindano makubwa.
Amesema kuwa Wachezaji wa England wana vipaji vikubwa lakini kwa kukosa mapumziko wakati huu wa Majira ya Baridi kutaiathiri England Mwezi Juni kwenye Fainali za Mataifa ya Ulaya, EURO 2016, zitakazochezwa Nchini France.
Klopp ameeleza, kuwa England chini ya Meneja Roy Hodgson, wanapaswa kutwaa EURO 2016 kwa vile wana vipaji vikubwa.
Klopp pia amesema hali hiyo inaathiri Vilabu vya England kushinda kwenye Mashindano ya Vilabu ya UEFA.
Hivi sasa Ligi zote kubwa Ulaya, La Liga ya Spain, Bundesliga ya Germany na Serie A ya Italy, pamoja na nyingine kadhaa, zipo mapumziko ya Krismasi na Mwaka Mpya.
Ndani ya siku nane Kikosi cha Liverpool chini ya Klopp kinakabiliwa na Mechi 3 kuanzia Jumamosi watakapokuwa kwao Anfield kuwavaa Vinara wa Ligi Leicester City.