‘Pokea saluti mpiganaji, Danny Mwakiteleko’ baadhi ya waombolezaji wakitoa heshima za mwisho kwa mwili wa Mwakiteleko.
Na Mwandishi Wetu
MWILI wa Marehemu, Danny Mwakiteleko umeagwa leo nyumbani kwake Tabata Chang’ombe jijini Dar es Salaam na mamia ya waombolezaji wakiwemo viongozi mbalimbali wakiongozwa na Waziri wa Habari, Vijana Utamaduni na Michezo, Emmanuel Nchimbi.
Baada ya taratibu za kutoa salamu za mwisho ambazo ziliratibiwa na viongozi wa ngazi za juu wa Jukwaa la Wahariri Tanzania (TEF), chini ya usimamizi wa Mwenyekiti wake, Absalom Kibanda msafara wa kuelekea mkoani Mbeya kwa mazishi ulianza.
Hali ya majonzi ilizidi baada ya ndugu, jamaa na marafiki waliokuwa wakipita mbele ya mwili wa marehemu Mwakiteleko huku baadhi wakiangua vilio na wengine kushindwa kujizuia na kupoteza fahamu mara malipouona mwili huo.
Miongoni mwa viongozi waliofika kutoa heshima za mwisho ni Mbunge wa Bumbuli, January Makamba, Mkurugenzi wa Kurugenzi ya Mawasiliano Ikulu, Salva Rweyemamu, viongozi mbalimbali na watu maarufu. Mwili wa marehemu Mwakiteleko unatarajiwa kuzikwa mkoani Mbeya. Uongozi wa mtandao huu utaendelea kuwaleteeni taarifa na picha za matukio ya shughuli za mazishi hayo.
Bwana ametoa na Bwana ametwaa, jina lake lihimidiwe. Amin.