MKE wa Makamu wa Rais wa Tanzania, Mama Zakhia Bilal, anatarajia kuwa mgeni rasmi katika uzinduzi rasmi wa kundi jipya la muziki wa taarab na albam ya kwanza ya kundi hilo (Tanzania Modern Taarab ‘T-Moto’ au Real Madrid), ambalo kwa sasa limekuwa gumzo kwa mashabiki wa muziki huo nchini.
Akizungumza na mwandishi wa habari, Mkurugenzi wa kundi hilo, Amini Salmini, alisema uzinduzi huo ulisogezwa mbele hadi Ijumaa, badala ya tarehe ya kwanza yaani Oktoba 28, ukumbi uliopangwa kuwa na shughuli ya ghafla ya Waziri Mkuu katika tarehe ya uzinduzi huo.
Aidha Amini alisema baada ya ratiba hizo kuingiliana kwenye Ukumbi Diamond Jubilee, ilibidi kundi hilo kusogeza mbele uzinduzi wake ambapo kwa sasa maandalizi yote kuhusu uzinduzi tayari yamekamilika.
Amini alivitaja vikundi vitakavyosindikiza onyesho la uzinduzi huo kuwa ni pamoja na Bendi mahiri inayoundwa na vijana watatu, Mapacha wa3, Bendi kongwe nchini, Msondo Ngoma, Sabaha Salum, anayeimba miondoko ya Taarab pamoja na Kikundi cha Sanaa cha Twins Voice, kinachoimba nyimbo za kuhamasisha kujilinda dhidi ya magonjwa ya Ukimwi.
Pia Amini alitaja viingilio vya onyesho hilo kuwa mashabiki wote wataingi ukumbini kushuhudia onyesho hilo kwa kulipa sh, 10,000 tu, ambapo pia baada ya uzinduzi huo zitapatikana Kanda za albam hiyo zitakazokuwa zikiuzwa ukumbini humo.