Mke wa Rais Mama Salma Kikwete akisalimiana na wananchi mbalimbali waliofika kuwapokea wakati walipowasili kwenye kijiji cha Kipengere tarehe 19.10.2013.
Rais Jakaya Kikwete akikata utepe ikiwa ni ishara ya kuzindua rasmi Chuo cha VETA cha Wilaya ya Makete tarehe 19.10.2013 kilichojengwa katika Mji wa Iwawa, Makao Makuu ya wilaya hiyo. Katika hafla hiyo uongozi wa Chuo hicho umeamua kukipa jina la Jakaya Kikwete kwa jitihada zake alizowezesha wilaya ya Makete kuwa ya kwanza nchini kuwa na chuo cha VETA cha wilaya. Kulia kwa Rais Kikwete ni Waziri wa Elimu NA Ufundi Dr. Shukuru Kawambwa na kushoto ni Mkuu wa Wilaya ya Makete Ndugu Josephine Matiro.
Na Anna Nkinda- Maelezo, Wanging’ombe
MKE wa Rais Mama Salma Kikwete amewataka kinamama wa wilaya ya Wanging’ombe mkoani Njombe kusimamia elimu ya watoto wao wa kike ili waweze kusoma na kufika ngazi ya chuo kikuu kitendo ambacho kitaongeza idadi ya wanawake viongozi nchini.
Mama Kikwete ambaye pia ni Mwenyekiti wa Taasisi ya Wanawake na Maendeleo (WAMA) aliutoa wito huo jana wakati akiongea kwenye mkutano wa hadhara uliofanyika katika kijiji cha Kipengere wilaya ya Wanging’ombe mkoani Njombe.
Alisema kutokana na historia wanawake walikuwa wameachwa nyuma kimaendeleo ikiwa ni pamoja na kukosa fursa ya kupata elimu ukilinganisha na watoto wa kiume hivyo basi ni jukumu la kina mama kusimamia elimu ya watoto wao ikiwa ni pamoja na kuhakikisha wanakwenda shule kwa wakati kwani mtoto wa kike akiwa na kipato hawezi kumtupa mzazi wake.
“Bila ya kuwa na elimu huwezi kupata maendeleo kwani elimu ni msingi wa kila kitu na ukiwa na elimu utaweza kuepukana na matatizo ya ujinga, maradhi na umaskini kwani ukienda shule utafundishwa mambo mengi ambayo yatakusaidia katika maisha yako hivyo basi ni muhimu kwa vijana wakaenda shule ili wapate elimu”, alisema Mama Kikwete.
Kuhusiana na maambukizi ya Virusi vya Ukimwi Mwenyekiti huyo wa WAMA aliwataka wananchi wa wilaya hiyo kuchukua tahadhari ikiwa ni pamoja na kwa wale wenye ndoa kuwa waaminifu kwa wenzi wao na wale wasio na ndoa kuwa na subira hadi wakati utakapofika na wasikubali kufunga ndoa kabla ya kwenda kupima kwani kasi ya maambukizi iko juu kwa asilimia 15.3 ukilinganisha na maambukizi ya mkoa ambayo ni asilimia 14.8.
Mama Kikwete alisema, “Katika wilaya hii pia kuna tatizo la vifo vya kina mama wajawazito vinavyotokea wakati wa kujifungua ni jukumu la kila mmoja wetu kuhakikisha kuwa vifo hivi vinapungua kwani si jambo zuri kwa mama kupoteza maisha wakati akileta uhai wa mtoto Duniani,”.
Kwa upande wake Mbunge wa Jimbo la Njombe Magharibi ambaye pia ni Naibu waziri wa Ujenzi Mhandisi Gerson Lwenge alimuomba mama Kikwete awasaidie kina mama wa wilaya hiyo vitanda vya kisasa vya kujifungulia vitatu ambavyo vitatumika katika vituo vya Afya vya Mdandu, Makoga na Wanging’ombe na Mama Kikwete aliahidi kulifanyia kazi ombi hilo.
Taarifa ya wilaya hiyo inaonyesha kuna jumla ya wanafunzi wa sekondari wa kike 4184 toka Januari mwaka 2013 hadi sasa waliokatiza masomo kwa kupata ujauzito ni 12 kwa upande wa shule za msingi hakuna mwanafunzi aliyepata ujauzito kwa kipindi cha mwaka 2012/13.
Kwa upande wa tatizo la vifo vya kina mama wajawazito vinavyotokea wakati wa kujifungua idadi imepungua kutoka 112 kwa kila vizazi hai 100000 kwa mwaka 2010 na kufikia38 kwa kila vizazi hai 100000 kwa mwaka 2012. Vifo vya watoto wenye umri wa chini ya mwaka mmoja vimepungua kutoka 12 kwa kila vizazi hai 1000 kwa mwaka 2010 hadi kufikia 6 kwa kila vizazi hai 1000 kwa mwaka 2012.
Mama Kikwete ameambatana na mmewe Rais Dk. Jakaya Mrisho Kikwete katika ziara ya kikazi ya siku saba mkoani Njombe ambapo jana Rais Kikwete aliongea na wananchi wa Kijiji cha Kipengere wilayani Wanging’ombe.
Akiwa wilayani Makete Rais Dk. Kikwete aliweka jiwe la msingi madarasa ya kidato cha tano katika shule ya Sekondari Lupalilo, kuweka jiwe la msingi la ujenzi wa Zahanati ya Ivalalila, kuzindua chuo cha VETA na kuongea na wananchi wa wilaya hiyo.