Mabondia mikono juu!
MABONDIA Issa Omar na Shaban Madilu ambao wanatarajia kucheza pambano lao la raundi 10 Ubingwa wa UBO International, wakisindikizwa na wakongwe wa masumbwi nchini Joseph Marwa atakaezipiga na Amour Mzungu wanatarajia kupima afya zao pamoja na uzito siku ya Jumamosi tayari kwa mpambano huo.
Mabondia wote hao na wa uzito wa juu Ramadhan Kido na Musa Mbabe wanategemea kupima afya zao na uzito siku hiyo majira ya saa nne asubuhi katika Ukumbi wa CCM Mwinjuma – Mwananyamala.
Zoezi zima la upimaji litaongozwa na Dk. Donard Madono akisaidiwa na Emanuel Mlundwa. Pambano la Marwa na Mzungu linapewa jina kama pambano la kisasi, baada ya Mzungu kupigwa na Marwa miaka saba iliyopita hivyo kutarajiwa kulipiza kisasi.
Mpambano huo ulioandaliwa na Bigright Promotion na kusimamiwa na PST kama mwakilishi wa UBO nchini unategemea kuwakutanisha mabondia mbalimbali wenye uwezo mzuri na kuwavutia mashabiki wa mchezo huo kwa kushuhudia mapambano zaidi ya tisa kwa wakati mmoja.
Mabondia wanaotarajiwa kupima uzito siku hiyo tayari kwa pambano ni pamoja na Ide Mnali toka Mtwara atakaezipiga na Zumba Kukwe wa Dar e s Salaam, Husein Mbonde atazipiga na Mwaite Juma, Martin Richard atapigana na Faraji Sayuni, Salum Chandonga atazipiga na mdogo wake Amour Mzungu, Mohamed Mzungu.
Wengine ni Herman Richard na Kade Hamis, Kani West na Nasor Hatibu, James Edmond na Julias Anastaz. Pia kutakuwa na maonesho ya ngumi za watoto wenye vipaji. Mpaka leo haijaripotiwa kutokea kwa kikwazo chochote na mabondia karibu wote wapo katika hali nzuri na tayari kwa mpambano.