Mtuhumiwa wa mauaji ya Steven Kanumba, Elizabeth Michael 'Lulu'
Na Mwandishi Wetu
MSANII nyota wa filamu Elizabeth Michael (18)ambaye anafahamika zaidi kwa jina la sanaa Lulu leo amefikishwa katika Mahakama ya Hakimu Mkazi ya Kisutu jijini Dar es Salaam akituhumiwa kwa kosa la kumuua msanii maarufu Steven Kanumba.
Lulu amefikishwa mahakamani majira ya saa tano na dakika 20 asubuhi na gari la Jeshi la Polisi ambalo linaonekana lilikuwa limebadilishwa namba za usajili. Gari hilo lilikuwa na namba za usajili T848DNV huku pembezoni katika vioo ikisomeka namba nyingine ya usajili PT 2565 aina ya Rav 4.
Lulu ambaye ni mkazi wa Tabata jijini Dar es Salaam amesomewa mashtaka yake na Wakili wa Serikali, Elizabeth Kaganda mbele ya Hakimu Mkazi wa Mahakama ya Kisutu, Agustina Mmbando.
Akisoma mashtaka hayo Wakili Kaganda alidaia mtuhumiwa (Elizabeth Michael) alitenda kosa hilo Aprili 7, 2012 nyumbani kwa marehemu Steven Kanumba Sinza Vatican jijini Dar es Salaam usiku.
Hata hivyo mtuhumiwa amepinga kuwa hana umri wa miaka 18 kama ilivyotajwa bali ana umri wa miaka 17. Mtuhumiwa hakutakiwa kujibu chochote kwa kuwa uchunguzi bado unaendelea, na kesi hiyo itatajwa tena Aprili 23, 2012.