Ikulu Yatuma Rambirambi Kifo cha Mbunge, CUF

RAIS wa Jamhuri ya Muungano wa Tanzania, Dk. Jakaya Mrisho Kikwete amemtumia Salamu za Rambirambi Spika wa Bunge la Jamhuri ya Muungano wa Tanzania, Anne Semamba Makinda kuomboleza kifo cha aliyekuwa Mbunge wa Viti Maalumu kupitia Chama cha Wananchi (CUF), Clara Mwatuka aliyefariki dunia kwa ajali ya gari iliyotokea Wilaya ya Masasi Mkoani Mtwara tarehe 9 Agosti, 2015.

“Nimesikitishwa na kuhuzunishwa na kifo cha ghafla cha Mheshimiwa Clara Mwatuka kwani katika nafasi yake ya Ubunge wa Viti Maalumu kwa tiketi ya Chama cha Wananchi (CUF), alitimiza vyema majukumu yake ya kuwahudumia wananchi wa Wilaya ya Masasi”.

Kutokana na kifo cha Mbunge huyo, Rais Kikwete ametoa pole kwa familia yake kwa kumpoteza Mzazi, kwa chama cha CUF kwa kumpoteza Mwanachama na Mbunge wake, na kwa Wananchi wa Wilaya ya Masasi kwa kumpoteza aliyekuwa Mwakilishi wao Bungeni.

Rais Kikwete amesema anamwomba Mwenyezi Mungu, Mwingi wa Rehema aipokee na kuilaza Mahala Pema Peponi Roho ya Marehemu Clara Mwatuka, na ameiomba familia ya Marehemu kuwa na uvumilivu na utulivu kipindi hiki kigumu cha maombolezo ya Mzazi na mpendwa wao.