Mke wa nahodha wa Manchester United Wayne Rooney, Coleen Rooney, ametangaza kwamba atakula kondo lake la nyuma baada ya kuzaliwa kwa mwana wao wa tatu aliyepewa jina Kit.
Kondo hilo la nyuma, limetengenezwa na kuwa vidonge na anasema amekabidhiwa vikiwa vimewekwa kwenye jagi.
Vidonge hivyo vimeandaliwa na “mtaalamu wa kugeuza kondo la nyuma kuwa vidonge”, anayesema kumeza vidonge hivyo humsaidia mwanamke aliyejifungua kurejelea hali yake ya kawaida haraka.
Mwingine aliyewahi kufanya hivyo awali ni Kim Kardashian, aliyekula kondo lake la nyuma baada ya kujifungua mtoto wake wa kwanza North West.
Mwigizaji wa Mad Men January Jones pia alikula kondo lake la nyuma baada ya kujifungua mwanawe wa kiume Xander mwaka 2011.
Mke wa nahodha wa klabu ya Manchester United ya Uingereza Wayne Rooney amejifungua mtoto mvulana.
Mwanasoka huyo alitangaza kuzaliwa kwa mtoto huyo Jumapili usiku iliyopita kupitia mtandao wa Twitter, ambako anafuatwa na watu 12.5 milioni.
Rooney mkewe Coleen tayari wana watoto wawili wa kiume, Kai mwenye umri wa miaka sita na Klay mwenye umri wa miaka miwili.
Mapema Jumatatu, alipakia picha ya mtoto huyo kwenye Twitter, baada yake kumuona mara ya kwanza, na kuandika: “Kukutana na Kit kwa mara ya kwanza. Twaenda nyumbani sasa”.