Moshi,
Taarifa zilizotufikia muda huu ni kwamba; ajali mbaya imetokea mjini Moshi katika barabara ya Kibosho ambapo magari takribani manne yamehusika katika ajali hiyo. Kwa mujibu wa taarifa kutoka eneo la tukio jumla ya watu 11 hadi sasa wamepoteza maisha na wengine 22 kujeruhiwa.
Chanzo chetu cha habari kinasema ajali hiyo inadaiwa kusababishwa na basi dogo aina ya Fuso, ambalo lilikuwa limebeba wafanyakazi kutoka shamba la kahawa la Chibo, lililopoteza muelekeo na kugonga gari dogo aina ya Prado kabla ya kuligonga tena basi aina ya Scania. Kugongwa kwa magari hayo kulisababisha yapoteze mwelekeo na yote kupinduka na kuleta madhara makubwa kwa abiria wa magari hayo.
Miili yote na majeruhi wamepelekwa katika Hospitali ya KCMC mjini Moshi. Mtandao huu utawapa taarifa kamili mara tutakapozipata kutoka kwa vyanzo sahihi mkoani Kilimanjaro.