Ofisa Habari wa TFF, Boniface Wambura
BONIFACE Wambura ambaye kwa sasa ni Mwenyekiti wa Kamati ya Viwango ya Kamisheni ya Ngumi za Kulipwa Tanzania (TPBC), ameteuliwa kuwa Mwenyekiti wa Kamatiu ya Viwango ya Chama cha Ngumi za Kulipwa Afrika ya Mashariki na Kati (ECAPBA).
Boniface ambaye pia ni Ofisa Habari wa Shirikisho la Mpira wa Miguu Tanzania (TFF), ni mtaalamu wa fani ya uandishi wa habari na masuala ya sheria, ambaye amewahi kufanya kazi kama Mwandishi Mwandamizi na Mhariri kwenye vyombo mbalimbali vya habari.
Wambura anategemewa kuleta ujuzi wake wa mawasiliano na masuala ya sheria kwenye shirikisho linaloendelea kufanya vizuri katika ukanda huu wa Afrika ya Mashariki na Kati. Wambura anategemea kuongoza kamati ya watu watano (5) yenye jukumu la kuandaa na kuendeleza orodha ya viwango vya mabondia toka nchi za Afrika ya Mashariki na Kati.
Baadhi ya wajumbe wanaounda Kamati ya Viwango ya ECAPBA ni pamoja na Simon Mukisa Katogole wa Uganda na Steven Okumu toka Kenya.