Na Mwandishi Wetu
BONDIA Ibrahimu Tamba anapanda tena uringoni Novemba 22 katika ukumbi wa Frends Corner Manzese Dar es Salaam kuwania mkanda wa ubingwa na bondia Baraka Mwakansope kutoka Mbeya ukiwa ni mpambano wa raundi kumi wa kilogramu 73.
Mpambano huo unatarajiwa kuwa wa kisasi baada ya mara ya kwanza Tamba kumchapa bondia Maisha Samsoni wa Mbeya hivyo Mwakansope amekuja kwa ajili ya kulipiza kisasi cha kupigwa kwa bondia mwenzake katika mpambano uliofanyika mwanzoni mwa mwaka huu.
Mratibu wa mpambano huo Jaffar Ndame akizungumza alisema kuwa siku hiyo kutakuwa na mapambano mawili ya ubingwa ambapo bondia Julius Kisalawe atapambana na Ramadhani Kumbele kwa pambano la kilogram 51 ubingwa wa Taifa katika mpambano wa raundi kumi.
Mpambano mwingine utawakutanisha bondia Pius Kazaula wa Morogoro atakaepambana na Abdallah Luwanje wakati bondia chipukizi kutoka Super D Boxing Promotion, Vicent Mbilinyi atakabiliana na Said Tampoo kutoka Bagamoyo.
Aliongeza kuwa siku hiyo kutakuwa na mapambano mengine ya mabondia chipukizi mbalimbali na burudani za kutosha hivyo kuwataka wapenzi na mashabiki wa mchezo wa masumbwi kuwahi ukumbini kwani michezo itaanza rasmi kuanzia saa 11 jioni na kumalizika majira ya saa tano kasorobo usiku.