Mke wa Rais wa Tanzania, Mama Salma Kikwete
Na Anna Nkinda – Maelezo, Mbeya
WANAWAKE nchini wametakiwa kutokuwatupa watoto wanaowazaa hata kama wanakabiliwa na changamoto za kimaisha ikiwa ni pamoja na kushindwa kuwalea kwani, kufanya hivyo ni kumkosea Mungu na huwezi kujua watoto hao watakuwa na hali gani ya kimaisha kwa siku za baadaye.
Wito huo umetolewa leo na Mke wa Rais Mama Salma Kikwete wakati akizungumza na wanawake waliohudhulia sherehe za Maadhimisho ya Siku ya Mwanamke wa Chuo Kikuu Cha Teofilo Kisanji (TEKU) kilichopo jijini Mbeya.
Aidha Mama Kikwete ambaye pia ni Mwenyekiti wa Taasisi ya Wanawake na Maendeleo (WAMA) alisema kuwa usawa wa kijinsia katika elimu na fursa za kiuchumi zimeendelea kuwa changamoto kwa wanawake Duniani kote hata hivyo hatua kubwa imefikiwa ya kuwakomboa wanawake wengi kutoka lindi la umasikini.
“Tunatambua kwamba wanawake wanaposhiriki kikamilifu katika shughuli za jamii uchumi wa nchi hukua zaidi. Hivyo siku kama ya leo ni nyenzo muhimu katika kuwawezesha wanawake kujifunza kutoka kwa wengine jinsi walivyofanikiwa, kubadilishana uzoefu na kuelimishana. Kwani elimu yenye manufaa ni ile inayolenga kuwakomboa watu kutokana na changamoto zinazowakabili,” alisema Mama Kikwete.
Mama Kikwete aliwaasa wanafunzi wa chuo hicho kusimama imara na kuwa na mipango na malengo ya maisha baada ya kumaliza chuo, wakabiliane na changamoto zinazowakabili, wasidanganywe na vitu vidogodogo ambavyo vinaweza kuwaharibia maisha yao ya baadaye.
Akisoma risala ya chuo Makamu Mkuu wa Chuo Profesa Tuli Kassimoto alisema kuwa chuo hicho kinachomilikiwa na kanisa la Moravian Tanzania kilianzishwa mwaka 2006 kinajumla ya wanafunzi 3978 kati ya hao 2463 ni wanaume na 1515 ni wanawake.
Alisema kuwa tatizo kubwa linalokikabili chuo hicho ni ukosefu wa mahali pa kulala kwa wanafunzi licha ya kuwa na idadi kubwa ya wanachuo, wanachuo 200 ndiyo wameweza kupata nafasi ya kulala chuoni wengine wanalala nje ya chuo na baadhi ya nyumba wanazolala si nzuri na hazina ubora na usalama.
Profesa Kassimoto alisema, “Ili kutatua tatizo hili chuo kiliomba mkopo kutoka Mamlaka ya Elimu Tanzania walitupatia shilingi milioni 500 kwa ajili ya ujenzi wa Hosteli ya wasichana ambayo itakapokamilika itachukua watu 316 hii ni idadi ndogo ukilinganisha na mahitaji”.
Alisema kuwa kwa kuzingatia matatizo yanayowakabili wanachuo wanawake, waliona umuhimu wa kuwa na siku ya mwanamke wa TEKU ambayo ilitumika kukaa pamoja kama jamii, kufurahi, kuelimishana kwa njia mbalimbali na kuithamini nafasi ya mwanamke katika jamii.
Sherehe hiyo ilienda sambamba na uchangiaji wa fedha za mfuko wa elimu wa wanawake wa TEKU ambapo familia ya Rais Kikwete alichangia sh. milioni tano, Taasisi ya WAMA milioni mbili pamoja na wadau mbalimbali walichangia na hivyo kufanya fedha zilizopatikana kufikia milioni 15. Fedha hizo zitatumika kununua vifaa vya hosteli inayojengwa na chuo hicho kwa ajili ya wanachuo wanawake na kutatua matatizo ya wanachuo wa kike.