Waziri Mkuu, Kassim Majliwa akipokea hundi ya shilingi milioni 80 kutoka kwa Balozi wa Pakistan nchini, Amir Khan (wapili kushoto ukiwa ni mchango kwa waathirika wa tetemeko la ardhi mkoani Kagera. Makabidhiano hayo yalifanyika kwenye hoteli ya Kyatt Regency jijini Dar es salaam Septemba 30, 2016. Kushoto ni Waziri wa Mambo ya Nje na Ushirikiano wa Afrika ya Mashariki, Augustine Mahiga na kulia ni Waziri wa Elimu na Mafunzo ya Ufundi, Profesa Joyce Ndalichako.
Na Ally Daud, MAELEZO-Dar es Salaam
WAZIRI Mkuu, Kassim Majaliwa amepokea msaada wa Tsh. Milioni 60 kutoka kwa Balozi wa China nchini, Lu Youqing ikiwa ni mchango wa Serikali yao kwa ajili ya ukarabati wa shule zilizoharibika kutokana na tetemeko la ardhi lilitokea mkoani Kagera tarehe 10 Septemba, mwaka huu.
Akizungumza wakati wa kupokea msaada huo leo jijini Dar es salaam, Waziri Mkuu Majaliwa aliishukuru Serikali ya Jamhuri ya watu wa China kwa kuwa wameonyesha kuguswa na madhara hayo na kuahidi kuwa msaada huo utasaidia kukarabati upya miundombinu ya shule mbalimbali mkoanihumo.
“Tanzania inaishukuru kwa dhati Serikali ya Jamhuri ya watu wa China kwa kutoa msaada huu wa shilingi milioni 60 kwa kuwa utatusaidia katika kukarabati na kutengeneza shule zilizoharibika kutokana na tetemeko Mkoani Kagera” alisema Mhe. Majaliwa.
Waziri Mkuu, Kassim Majaliwa akipokea hundi ya Shilingi milioni 50 kutoka kwa Mwakilishi Mkazi wa Tasisi ya Aga khan nchini, Amin Kurji (kulia) ukiwa ni mchango kwa waathirika wa tetemeko la ardhi mkoani Kagera. Makabidhiano hayo yalifanyika Ofisini kwa Waziri Mkuu jijini Dar es salaam Septemba 30, 2016. Kushoto ni Waziri wa Mambo ya Nje na Ushirikiano wa Afrika ya Mashariki, Augustine Mahiga na wapili kulia ni Waziri wa Elimu na Mafunzo ya Ufundi, Profesa Joyce Ndalichako. (Picha na Ofisi ya Waziri Mkuu)
Aidha Waziri Mkuu Mhe. Majaliwa aliwaomba Watanzania pamoja na makampuni mbalimbali kuendelea kuwachangia wananchi wa kagera walioathirika na tetemeko hilo ili kuwafariji na kuirudisha kagera katika hali yake ya zamani.
Kwa upande wa Balozi wa China nchini Tanzania Balozi Lu Youqing alisema wameguswa na janga hilo na kuamua kuchangia kiasi hiko cha fedha ili kuweza kukarabati shule zilizoharibika kutokana na tetemeko la ardhi mkoani humo.
Balozi Lu Youqing alisema kuwa kwa msaada huo wanaamini kwa wanafunzi wa mkoa wa Kagera ambao shule zao zimeathirika kutokana na tetemeko hilo zitasimama upya na watasoma vizuri kwenye majengo yaliyo bora na hivyo kuendelea kuinua kiwango cha elimu mkoani humo.