Mchezo wa Serengeti Boys (jezi za bluu) na timu ya Congo Brazzaville (jezi nyekundu) ukiendelea.
TIMU ya ‘Serengeti Boys’ imepata ushindi wa goli 3-2 dhidi ya Congo Brazzaville kwenye uwanja wa nyumbani ikiwa ni mchezo wa kuwania kufuzu mashindano ya mataifa ya Afrika kwa vijana yatakayofanyika Madagascar mwaka 2017.
Makinda hao wa taifa vijana chini ya miaka 17 wamepata magoli yake kupitia kwa Yohana Mkomola aliyefunga magoli mawili kipindi cha kwanza huku goli la tatu likifungwa na Issa Makamba kipindi cha pili. Serengeti Boys ilipata pigo kipindi cha pili kufatia golikipa namba moja Ramadhani Kabwili aliyepata majera wakati akijaribu kuokoa mkwaju wa penati uliopigwa na Langa-Lesse Percy.
Endapo Serengeti itafanikiwa kuitupa nje Congo Brazzaville kwenye mchezo wa marudiano utakaochezwa wiki mbili zijazo, itakuwa imefuzu kucheza michuano ya Afrika kwa vijana.