Polisi jijini Dar es Salaam wakiwa doria.
MKUU wa Wilaya ya Kinondoni Mh. Ally Salum Hapi jana usiku majira ya saa 7 na 8 alifanya doria ya kushtukiza maeneo ya mitaa ya Oysterbay, Masaki na Kinondoni akiwa na kikosi cha Polisi cha Doria za usiku. Akiwa amevalia kofia ya kapelo huku akifuatiwa kwa nyuma na gari la polisi, katika doria hiyo Mh. Hapi alivamia kwa kushtukiza eneo Oysterbay ambalo lina Club za usiku zinazopiga muziki nje kinyume na taratibu.
Mh. Mkuu wa Wilaya alifika katika club za Next Door na Samaki Samaki ambapo na kukuta muziki mkubwa ukipigwa na wahusika bila hofu na kuagiza polisi kuwakamata mameneja wote wa club hizo pamoja na wapiga muziki (DJ’s) na mashine zao za muziki ambapo walipakizwa kwenye gari la polisi kimya kimya.
Hapi aliwaeleza wahusika hao kuwa hawezi kukubali kuona sheria zinavunjwa na wananchi wanateseka kwa adha ya kelele za muziki zinazosababishwa na club hizo licha ya kuonywa mara kadhaa kuacha tabia hiyo.
“Mmepewa onyo mara kadhaa na polisi, lakini mnafanya jeuri. Sasa nimekuja mwenyewe, na nitahakikisha mnalala rumande weekend hii ili muheshimu sheria tulizojiwekea..” alisema DC.
Mkuu huyo wa Wilaya ya Kinondoni akiwa na kikosi cha doria waliwafikisha kituo cha polisi cha polisi cha Oysterbay watuhumiwa hao na kuelekeza walale korokoroni huku taratibu nyingine zikisubiriwa.
DC Hapi alitembelea pia maeneo ya Masaki na mitaa mingine ya Kinondoni kabla ya kwenda kupumzika.