Klabu ya Manchester United imeshindwa kutamba kwenye uwanja wake wa nyumbani baada ya kujikuta ikigaragazwa kwa bao 1-0 dhidi ya Southampton kwenye mchezo wa ligi kuu England uliochezwa kwenye uwanja wa Old Trafford.
Ilimchukua dakika saba tu, Charlie Austin kuiandikia bao Southampton akitokea benchi dakika ya 79 kuchukua nafasi ya Mane. Austin aliweka mpira wavuni dakika ya 87 akiunganisha kwa kichwa krosi ya James Ward-Prowse na kuipa ushindi timu yake ikiwa kwenye uwanja wa ugenini.
Kipigo cha jana kinaifanya Man United kuendelea kubaki nafasi ya 5 katika msimamo wa Ligi, ikiwa na point 37 katika michezo 23. Huo ni mchezo 6 kwa Man United kupoteza toka kuanza kwa msimu wa 2015/2016.
Manchester United na meneja wao Louis Van Gaal walizomewa na mashabiki baada ya timu hiyo kushindwa kufanya mashambulizi yoyote katika dakika 90.