Nembo ya Timu ya Yanga
Mwandishi Wetu
UONGOZI wa klabu ya Friends Rangers, umesema klabu ya Yanga isitarajie mteremko katika mchezo wao wa kuwania Kombe la FA, utakaofanyika kesho kutwa kwenye Uwanja wa Taifa jijini Dar es Salaam.
Ofisa Habari wa klabu hiyo Asha Kigundula, alisema licha ya kujua wanacheza na timu inayoongoza Ligi Kuu, wao wamejipanga kushinda mchezo huo. Kigundula alisema kuwa tayari kikosi chao kipo kambini kwa ajili ya kujiandaa na mchezo huo wa mzunguko wa tatu wa michuano hiyo.
Alisema Yanga isiwadharau na kuona wanacheza na timu ndogo inayocheza Ligi Daraja la kwanza wao wanaingia kamili kupata matokeo mazuri ya ushindi. Kigundula alisema Yanga isiifananishe timu yao na timu iliyoifunga mabao 5-0, hivyo kwao wanakuja kamili kuhakikisha wanaitoa na kuendelea katika hatua inayofuata.
“Tumejipanga kushinda hivyo Yanga ifute ndoto za kutufunga kwa sababu juzi ilipata ushindi wa mabao mengi, wameifunga timu ambayo ilipanda kizengwe wasubili waone tutakachowafanya,” alisema Kigundula.
Hata hivyo Kigundula amewataka mashabiki wa timu hiyo wajitokeze kwa wingi katika mchezo wao ili waweze kuwapa hali zaidi wachezaji wao wacheze kwa kujiamini zaidi.