NCHI ya Ufaransa imetangaza hali ya hatari na kufunga mipaka yake baada ya watu zaidi ya 120 kuuawa kwenye mashambulio kadha mjini Paris. Watu 120 wameuawa katika ukumbi wa sanaa wa Bataclan, katikati mwa Mji wa Paris.
Watu wenye silaha walishika mateka watu waliokuwa kwenye ukumbi huo kabla ya kuzidiwa nguvu na maofisa wa polisi.
Watu wengine waliuawa kwenye mlipuko uliotokea karibu na uwanja wa michezo wa taifa wa Stade de France ambako mechi ya kirafiki kati ya Ufaransa na Ujerumani ilikuwa ikiendelea. Mashabiki waliingia uwanjani baada ya milipuko kutokea Stade de France.
Wasimamizi wa Mji wa Paris wamewataka raia kutotoka majumbani huku wanajeshi zaidi ya 1,500 wakiendelea na doria Paris. Hili ni shambulio mbaya zaidi kutokea Bataclan, ambako ripoti zinasema watu waliokuwa wamehudhuria tamasha ukumbini walipigwa risasi na kuuawa baada ya kutekwa.
Akizungumza katika ukumbi huo baadaye, Rais wa Ufaransa Francois Hollande ameapa kuwa wahusika watakabiliwa “bila huruma”. Tayari Rais wa Ufaransa Francois Hollande amehutubia taifa.
Mashambulio mengine yalitokea karibu na mighahawa ya Le Petit Cambodge na Le Carillon katika mtaa nambari 10 ambako mwandishi wa BBC anasema aliona watu 10 wakiwa wamelala chini, wakiwa wamejeruhiwa vibaya na wengine kufariki.
Mtu aliyeshuhudia ameambia gazeti la Liberation kwamba naye alisikia risasi zaidi ya 100 zikifyatuliwa katika mghahawa wa La Belle Equipe katika mtaa nambari 11. Milio ya risasi pia ilisikika katika kituo cha kibiashara cha Les Halles. Rais wa Marekani Barack Obama amelitaja shambulio hilo kuwa “jaribio lisilokubalika la kuhangaisha raia wasio na hatia” na kuahidi kusaidia Ufaransa kukabiliana na waliohusika.
“Hili si shambulio tu dhidi ya raia wa Ufaransa. Ni shambulio dhidi ya binadamu wote na maadili yetu ya pamoja,” amesema.
“Tutafanya kila tuwezalo kuwasaidia watu wa Ufaransa na mataifa kote duniani kuhakikisha magaidi hawa wanakabiliwa.” Waziri Mkuu wa Uingereza David Cameron amesema ameshtushwa sana na shambulio hilo na kuahidi kufanya “lolote tunaloweza kufanya kusaidia.”
-BBC