Mohammed Al Gaddafi, mtoto wa Kanali Gaddafi
PICHA za televisheni zinaonesha Waasi wakiwa katika Uwanja wa Green Square ndani ya Mji Mkuu, huku makundi ya watu wenye furaha wakisherehekea kuwasili kwa waasi hao katika uwanja huo. Taarifa zinaeleza Waasi wamemkamata mtoto wa Gaddafi Saif al-Islam, huku kiongozi mwenyewe akiahidi kuwa ataendelea kupigana.
Mwendesha Mashtaka wa Mahakama ya Uhalifu wa Kivita, Luis Moreno Ocampo amethibitisha Saif al-Islam, mwanawe Gaddafi, na ambaye alitarajiwa kumridhi babayake amekamatwa. Kifungua mimba huyo Mohammed Al Gaddafi naye amejisalimisha kwa waasi na anazuiliwa ndani ya kaya moja mjini Tripoli.
Serikali ya Libya imesema takriban wanajeshi elfu 65 watiifu wa kanali Gaddafi wamebakia mjini Tripoli lakini ni wachache tu walioonekana wakati waasi walipokuwa wakielekea kuuteka mji huo. Mapigano yameripotiwa katika maeneo mengine ya mji. Mwandishi wa BBC mjini Tripoli amesema waasi wanajaribu kushika udhibiti wa jengo ambalo waandishi wa habari wako.
Inaaminika kuwa bado Kanali Gaddafi ana maelfu ya wafuasi waliojihami, japo ripoti zinaashiria kuwa idadi kubwa wamejisalimisha kwa waasi. Msemaji wa Serikali ya Libya , Moussa Ibrahim, amesema takriban watu 1300 wameuwawa mjini humo.
Awali Kanali Gaddafi aliwataka raia kujitokeza na kuukomboa Mji wa Tripoli. ” Jitokezeni, jitokezeni niko nanyi. Msirudi nyuma. Tutapigana hadi kuikomboa nchi yetu kuzuia udhibiti. Msiwakubalie wanyakuzi kuiteka nchi yetu, nitapigana pamoja nayi kama nilivyoahidi,” alisema Muammar Gaddafi.
-BBC