Jan Eliasson
NAIBU Katibu Mkuu wa Umoja wa Mataifa (UN), J. Eliasson ameliambia Jopo la Watu Mashuhuri linaloongozwa na Rais wa Jamhuri ya Muungano wa Tanzania, Jakaya Kikwete kuwa hakuna shaka duniani kuwa magonjwa ya milipuko, kama vile Ebola, yataendelea kuisumbua dunia katika miaka ijayo na hivyo ni lazima maandalizi yafanyike kukabiliana na hali hiyo.
Aidha, Naibu Katibu Mkuu huyo amelitaka Jopo hilo linaloangalia jinsi gani dunia inavyoweza kujiandaa na kukabiliana ipasavyo na milipuko ya magonjwa kama Ebola katika siku zijazo, kuangalia sababu za msingi za kusambaa kwa kasi sana kwa ugonjwa wa Ebola katika nchi za Afrika Magharibi za Guinea, Liberia na Sierra Leone kulinganisha na kasi ya kusambaa kwa ugonjwa huo katika nchi nyingine za Afrika zilizopata kukabiliwa na ugonjwa huo kama vile Jamhuri ya Kidemokrasia ya Congo (DRC) na Uganda.
Eliasson aliyasema hayo , Jumatano, Mei 6, 2015 wakati alipokutana na kuzungumza na Jopo linaloongozwa na Rais Kikwete kwenye ofisi za Rais Kikwete kwenye Jengo la North Lawn Building katika Makao Makuu ya Umoja wa Mataifa (UN) mjini New York.
Akizungumza na wajumbe wa Jopo hilo ambalo mbali na Rais Kikwete wanatoka nchi za Brazil, Botswana, Indonesia, Uswisi na Marekani, Bwana Eliasson amewataka wajumbe wa Jopo hilo kupendekeza jinsi ya kukabiliana na magonjwa ya milipuko katika siku zijazo kwa sababu Ebola siyo ugonjwa wa mwisho wa mlipuko kushambulia dunia.
“Nyie mnajua, kama mimi ninavyojua, kuwa katika dunia ya leo kutakuwepo na mlipuko mwingine, kutakuwepo na mara nyingine…itakuwepo Ebola nyingine ama ugonjwa unaofanana na Ebola. Hivyo, tunahitaji maandalizi ya kiwango cha juu kupambana na hali hiyo itakapojitokeza. Lenu ni Jopo linalojitegemea na hivyo tunaamini litakuja na mapendekezo ambayo yatatuwezesha kukabiliana na hali hiyo,” alisema Bwana Eliasson ambaye ni raia wa Sweden.
Kuhusu kasi ya kusambaa kwa ugonjwa wa Ebola katika nchi za Afrika Magharibi za Guinea, Liberia na Sierra Leone, Naibu Katibu Mkuu alisema kuwa ni vyema na ni jambo la msingi sana kwa Jopo hilo kuangalia kwa nini ugonjwa huo ulisambaa kwa kasi ya kutisha kuliko wakati mwingine wowote katika historia ya miaka 40, tokea ulipogunduliwa kwa mara ya kwanza katika Jamhuri ya Kidemokrasia ya Congo (DRC).
“Tunajua kuwa nyie kazi yenu siyo kuchunguza ugonjwa wa Ebola. Ugonjwa huu tunautumia tu kuweka msingi wa miaka ya mbele. Hivyo ni lazima kuangalia sababu za kiini kabisa za kwa nini ugonjwa huo ulisambaa kwa kasi kubwa katika nchi hizo tatu. Tunajua kuwa hizi ni baadhi ya nchi masikini zaidi duniani. Tunaambiwa kuwa idadi ya waliofariki baada ya kupata ugonjwa huo ilikuwa ni asilimia 60. Lakini kama ugonjwa huo huo ungelipuka katika nchi iliyoendelea kasi ya vifo ingekuwa asilimia 25 tu.”
Eliasson alikuwa mmoja wa viongozi na wataalam ambao tokea Jumatatu wiki hii wamekuwa wanakutana na kuzungumza na wajumbe wa Jopo hilo ambalo liliteuliwa na Katibu Mkuu wa Umoja wa Mataifa (UN)Mheshimiwa Ban Ki Moon Aprili 2, mwaka huu, 2015. Ban Ki Moon alilitaka Jopo hilo linalojitegemea kupendekeza jinsi gani ya kuimarisha mifumo ya kitaifa na kimataifa, ili kuzuia na kujenga uwezo wa kukabiliana ipasavyo na mabalaa ya kiafya, kwa kutilia maanani mafunzo ambayo yametokana na mlipuko wa Ebola katika nchi tatu za Afrika Magharibi ambao umeua watu karibu 10,000 katika muda mfupi.
Alhamisi, Mei 7, 2015 wajumbe wa Jopo hilo wameshinda wamejifungia wakijadiliana wenyewe kwenye Kituo cha Utulivu (Retreat Centre) cha Green Tree nje kidogo ya Jiji la New York. Ijumaa, Mei 8, 2015 watakutana na kuwaelezea juu ya kazi yao Wawakilishi wa Kudumu wa Nchi Wanachama wa Umoja wa Mataifa na baadaye Rais Kikwete atakutana na kuhutubia mkutano wa waandishi wa habari, ikiwa ni kitendo cha mwisho cha mkutano huo wa kwanza wa Wajumbe wa Jopo hilo ambalo watakutana mara sita kabla ya kuwasilisha Ripoti yao kwa Mheshimiwa Ban Ki Moon Desemba mwaka huu.
Rais Kikwete na ujumbe wake, ataondoka mjini New York jioni ya leo kwenda Algiers, mji mkuu wa Algeria kuanza ziara rasmi ya kiserikali ya siku tatu katika nchi hiyo rafiki ya Afrika Kaskazini.