NSSF-Real Madrid Sports Academy
KUFUATIA mkataba maalum uliosainiwa 26/01/2015 Nchini Hispania kati ya Shirika la Taifa la Hifadhi ya Jamii (NSSF) na timu ya Real Madrid wa kuanzisha na kuendesha kituo cha michezo (NSSF- REAL MADRID Sports Academy) kwa lengo la kuibua, kuendeleza na kukuza vipaji kwa mpira wa miguu, shirika limeanza mchakato wa kuwabaini vijana walengwa wenye vipaji vya mpira wa miguu. Mchakato huo utaanzia mkoa wa Dar es Salaam kwa vijana wenye umri wa chini ya miaka 14.
Utafutaji wa vipaji utafanyika kiwilaya na utaanza na Wilaya za Mkoa wa Dar es salaam na utakuwa unafanyika katika viwanja vya Karume. Zoezi hilo litakuwa linafanyika kati ya saa 1 asubuhi hadi saa 9 alasiri kwa tarehe 14 na 15 na tarehe 22 na 23 Februari 2015.
Baada ya hapo itafata michezo ya majaribio tarehe 28 Februari na tarehe 1 Machi 2015 kwa wilaya zote za mkoa wa Dar es salaam itakayofanyika katika viwanja vya Karume kuanzia saa moja asubuhi hadi saa 9 alasiri. Zoezi la Uandikishaji halitahusisha gharama zozote kwa washiriki, na uandikishaji wa washiriki utafanyika kwa kujaza fomu maalum na kupewa namba ya ushiriki na kila mshiriki atapata fursa ya kucheza katika awamu mbili za dakika 30. Kwa kuanzia washiriki watatakiwa kuja na vifaa vyao vya michezo.
Zoezi la awali litafanywa na wataalam wa ndani ya nchi ambapo Vijana 500 kati ya wote watakaofanyiwa majaribio wataingia katika awamu ya pili ya majaribio na watadahiliwa na wataalamu kutoka Klabu ya Real Madrid na hatimaye kupatikana vijana 30 ambao ndio wataingia katika shule maalum ya mafunzo kwa awamu ya kwanza.
Wakati wa uandikishwaji washiriki watatakiwa kuja na wazazi/walezi wao wakiwa na vitambulisho vyao, na kijana husika awe na Cheti halisi cha kuzaliwa na kopi yake pamoja na picha mbili za pasport rangi ya blue. Muda wa uandikishaji na majaribio unaweza kuongezwa kulingana na mahitaji. Shirika la NSSF linatoa wito kwa vijana kujitokeza kwani ni fursa kwao ya kuweza kujiendeleza kimichezo na kujiajiri katika tasnia hiyo.
DAR ES SALAAM! Jiunge na Mabingwa
Kama wewe au mtu yeyote karibu yako ni mkali wa soka, unaishi Dar es Salaam na una umri chini ya miaka 14 karibu katika viwanja vya Karume kujiandikisha kujiunga na
NSSF – Real Madrid Academy
JUMAMOSI NA JUMAPILI TAREHE 14-15 FEBRUARI NA 21-22 FEBRUARI KUANZIA SAA 1 ASUBUHI HADI 9 MCHANA
Uandikishaji ni Bure
· Fika na mzazi au mlezi
· Njoo na cheti halisi cha kuzaliwa
na kopi moja
· Njoo na picha mbili za passpoti
rangi ya blu
· Vifaa vyako vya michezo
Mchujo wa kwanza wa vijana 500 utafanyiwa majaribio tarehe 28 Februari na 1 Machi viwanja vya Karume.