Mbu aenezae Malaria
UGONJWA wa malaria huwenda ukaendelea kuwa hatari zaidi kwa sasa baada ya wanasayansi kugunduwa aina mpya ya viini sugu vinavyosababisha ugonjwa huo ambavyo havisikii dawa za ugonjwa huo.
Taarifa zinasema watafiti wamegundua uwepo wa viini hivyo Magharibi mwa Cambodia na wanasema kuwa vina umbo tofauti la genetiki ukilinganishwa na viini vingine vilivyopo duniani. Taariza zaidi zinaeleza majaribio ya chanjo ya malaria inaonesha viini hivyo ni sugu kiasi cha kutosikia dawa aina ya Artemisinin, dawa ambayo ndio yenye nguvu zaidi katika kutibu Malaria.
Taarifa ya kwanza kuwa wagonjwa walikuwa hawatibiki na dawa hiyo ilitokea mwaka 2008. Tatizo hilo tangu hapo limeenea katika maeneo mengine ya Asia ya Kusini. Utafiti huo pia umechapishwa katika jarida la “Nature Genetics”
Mtafiti Mkuu Daktari Olivo Miotto, wa Chuo Kikuu cha Oxford na kile cha Mahidol nchini Thailand, alisema kuwa dawa zote zenye uwezo wa kuua Malaria na ambazo zimevumbuliwa katika miaka ya hivi karibuni, zimekuwa ovyo katika kutibu Malaria.
“Dawa ya Artemisinin kwa sasa inafanya kazi vyema. Ndio silaha nzuri zaidi dhidi ya ugonjwa huo na tunahitaji kuendelea kuitumia,” alisema Daktari Miotto
Magharibi mwa Cambodia kumetajwa kama sehemu yenye Malaria sugu. Haieleweki ni kwa nini tangu mapema miaka ya 1950, viini vya Malaria katika eneo hilo, vimekuwa sugu. Tatizo hilo pia limesambaa hadi katika sehemu kadhaa za Asia na Afrika.
Kwa sasa wanasayansi wana wasiwasi kuwa hali sawa na hiyo itajitokeza kwa dawa ya Artemisinin. Dawa hiyo ambayo inatumika kote duniani kukabiliana na Malaria, na inaweza kutibu ugonjwa kwa siku chache tu ikiwa itatumika na mchanganyiko wa dawa zengine.
-BBC