Ofisa Habari wa TFF, Boniface Wambura
Na Mwandishi Wetu
MKUTANO Mkuu wa Dharura wa Chama cha Mpira wa Miguu wa Wanawake Tanzania (TWFA) utafanyika Juni 23 mwaka huu kwenye ukumbi wa Msimbazi Centre, Dar es Salaam kuanzia saa 2.00 asubuhi.
Kwa mujibu wa taarifa iliyotolewa leo na Ofisa Habari wa TFF, Boniface Wambura amesema Mwenyekiti wa TWFA, Lina Kessy, amethibitisha ajenda kuu katika mkutano huo ni marekebisho ya Katiba ya chama hicho yanayotokana na maelekezo ya Kamati ya Sheria, Maadili na Hadhi za Wachezaji ya Shirikisho la Mpira wa Miguu Tanzania (TFF) juu ya marekebisho kwenye katiba za wanachama wake ambazo zina upungufu.
Wambura katika taarifa yake amesema tayari mapendekezo ya marekebisho hayo kulingana na mwongozo wa TFF yalishapitiwa na Kamati ya Utendaji ya TWFA.
Amesema mbali ya Kamati ya Utendaji, wajumbe wengine wa mkutano huo ni Mwenyekiti, Katibu na mjumbe wa Mkutano Mkuu kutokana vyama vya mpira wa miguu wa wanawake vya mikoa ya Tanzania Bara.
Ameongeza kuwa wajumbe watafikia kwenye hosteli ya Msimbazi Centre ambapo wanatakiwa kuripoti siku moja kabla ya mkutano huo.
“Mgeni rasmi atakayefungua mkutano huo anatarajiwa kuwa Mkurugenzi Msaidizi wa Maendeleo ya Michezo katika Wizara ya Habari, Vijana, Utamaduni na Michezo, Juliana Yasoda,” amesema Wambura katika taarifa yake.