Rais Jakaya Kikwete akitembelea maafa ya mafuriko Dar es Salaam leo.
Na Rajab Mkasaba, Ikulu Zanzibar
RAIS wa Zanzibar na Mwenyekiti wa Baraza la Mapinduzi, Dk. Ali Mohamed Shein amemtumia salamu za pole Rais wa Jamhuri ya Muungano wa Tanzania, Dk. Jakaya Kikwete kufuatia maafa yaliotokana na mafuriko yaliosababishwa na mvua kubwa iliyonyesha tokea juzi mjini Dar es Salaam.
Katika salamu hizo, Dk. Shein amepokea kwa masikitiko makubwa, taarifa ya mafuriko yaliyosababishwa na mvua kubwa iliyonyesha mjini Dar es Salaam hivyo baadhi ya watu kupoteza maisha na mali zao. Rais Dk. Shein na wananchi wa Zanzibar, ametuma salamu hizo za rambirambi kwa vifo vya watu waliopoteza maisha.
Aidha, salamu za pole zimetolewa kwa wote waliopata hasara kwa makaazi yao kukumbwa na maji na kupoteza mali zao pamoja na kupata usumbufu mkubwa wa maisha yao. Dk. Shein alieleza kuwa yeye pamoja na wananchi wote wa Zanzibar wanaungana na Rais Jakaya Kikwete na ndugu wote wa Tanzania Bara kuomboleza maafa hayo yalioikumba Taifa.
Dk. Shein amesema wanamuomba Mwenyezi Mungu awarehemu waliopoteza maisha na awape subira wafiwa wote. Pia amemuomba Mwenyezi Mungu kuleta rehema zaidi katika wakati huu wa mvua zikiwa zinaendelea maeneo anuai ya nchi.